U jednom od najboljih mečeva na ovogodišnjem Australian openu, Endi Marej je upisao prvu pobjedu protiv igrača iz top 20 na Grand slamovima još od 2017. godine. Mareju je ovo bila 50. pobjeda na Australian openu u karijeri.

Na kraju, nakon gotovo pet sati bespoštedne borbe i spašene meč lopte Škot je pobjedu upisao rezultatom 6:3, 6:3, 4:6, 6:7, 7:6.

Uz jedan brejk i prvom i dva u drugom Marej je poveo 2:0 u setovima, ali Beretini nije želio tako lako da ode iz Melbourena. Jedan brejk u trećem setu vratio ga je u život, a četvrti set bio je posebna igra nerava – ni jedna jedina brejk lopta u 12 gemova, da bi Italijan u tajbrejku uveo meč u peti set, piše Sport klub.

U odlučujućem dijelu igre, Beretini je prvi došao do meč lopte, igrao se deseti gem, Beretini je imao brejk loptu, ali je na 30:40 promašio zicer i zapravo time otvorio vrata novom tajbrejku u kome je Marej poveo i 5:0 prije nego što se i ovaj dio duela pretvorio u veliku borbu koju je na kraju Marej dobio rezultatom 10:6 iskoristivši prvu meč loptu.

Marej će u drugom kolu igrati protiv boljeg iz duela u kome se sastaju Fabio Fognjni i Tanasi Kokkinakis.